Երևան, 8 սեպտեմբերի. Հայաստանի պետական սիմֆոնիկ նվագախումբը պաշտոնապես ազդարարել է իր 21-րդ համերգաշրջանի մեկնարկը։ Սեպտեմբերի 8-ին կայացած մամուլի ասուլիսում ներկայացվել են գալիք տարվա ծրագրերը, հրավիրված համաշխարհային մենակատարները, ձայնագրությունները, կրթական նախաձեռնությունները և միջազգային ուղիները։ Այս առաքելությունը ոչ միայն երաժշտական է, այլև հայրենասիրական՝ հայ մշակույթը դնել աշխարհի քարտեզի վրա։
Ասուլիսին մասնակցում էին ԿԳՄՍ նախարարի տեղակալ Տիգրան Վիրաբյանը և նվագախմբի գեղարվեստական ղեկավար, գլխավոր դիրիժոր Սերգեյ Սմբատյանը։
20-րդ համերգաշրջանը՝ որպես հաղթանակ և նոր հնարավորությունների ապացույց
Տիգրան Վիրաբյանը նշեց, որ նվագախմբի գործունեությունը առանձնանում է ոչ միայն բարձրարվեստ կատարումներով, այլև ժամանակակից ու բազմաֆունկցիոնալ մոտեցմամբ։
«Ինձ համար մեծ պատիվ է այս նվագախմբի մասը լինելը, նրանց հետ աշխատելը և իմ երաժշտական կյանքի ամենակարևոր նախագծերը ստեղծելը։ Արդեն այս կարգավիճակում ինձ համար մեծ պատիվ է ներկայացնել Հայաստանի պետական սիմֆոնիկ նվագախմբի 21-րդ համերգաշրջանը», - ասել է նա։
Անդրադառնալով նախորդ տարվան՝ Վիրաբյանը հատկապես ընդգծեց նվագախմբի 20-ամյակին նվիրված մեծածավալ համերգը Մարզահամերգային համալիրի սպորտային դահլիճում։ Դա, նրա խոսքով, ռիսկային որոշում էր, քանի որ շատերը պնդում էին, թե դասական երաժշտությունը մեծ դահլիճների համար չէ։
«Մենք կարողացանք ապացուցել, որ Հայաստանի քաղաքացիները և դասական երաժշտության ունկնդիրներն այնքան էլ սակավաթիվ չեն, որքան երբեմն տպավորություն է ստեղծվում։ Խիզախեցինք և որոշեցինք մեծ համերգ անցկացնել Մարզահամերգային համալիրի սպորտային դահլիճում», - ասաց Վիրաբյանը։
Նա շեշտեց, որ ժամանակակից մշակութային միջավայրում կարևոր է ունենալ կոլեկտիվ, որը կարող է աշխատել տարբեր ժանրերում՝ համագործակցելով ինչպես համաշխարհային դասական աստղերի, այնպես էլ այլ երաժշտական ուղղությունների ներկայացուցիչների հետ։
Նվագախումբը՝ Հայաստանի սահմաններից դուրս. առաքելությունը՝ հայ մշակույթի ներկայությունը միջազգային բեմերում
21-րդ համերգաշրջանի առանցքային ուղղություններից է Հայաստանի մշակութային ներկայության ընդլայնումը արտերկրում։ Վիրաբյանը կարևորեց Սերգեյ Սմբատյանի միջազգային գործունեությունը՝ նշելով, որ նա աշխարհում մեծ պահանջարկ ունեցող դիրիժոր է։
«Սերգեյ Սմբատյանն աշխարհում մեծ պահանջարկ ունեցող դիրիժոր է, որին ամիսներով առիթ չենք ունենում Հայաստանում տեսնելու։ Սա շատ կարևոր է, որովհետև մենք ունենք այնպիսի դիրիժոր, որը կարող է ղեկավարել աշխարհի լավագույն նվագախմբերը։ Սա նաև հայկական մշակույթի ձեռքբերումն է», - նշեց նա։
Համաշխարհային մենակատարները՝ Հայաստանում. երկիրը՝ մշակութային քարտեզի վրա
Նոր համերգաշրջանում նվագախմբի հետ հանդես կգան միջազգային ճանաչում ունեցող բազմաթիվ երաժիշտներ՝ ջութակահարներ Նոա Բենդիքսը, Դիանա Ադամյանը, դաշնակահարներ Բրյուս Լյուն, Ալիս Սառա Օտտը, Բեհզոդ Աբդուրաիմովը, Եվա Գևորգյանը, Ալեքսանդր Մալոֆեևը, թավջութակահարներ Գայ Ջոնսոնը, Կամիլ Թոման, կիթառահար Պաբլո Սաինս Վիլեգասը, շեփորահար Սերգեյ Նակարյակովը, ալտահարներ Դեյվիդ Աարոն Քարփենթերը և Թիմոթի Ռիդաութը։
Սերգեյ Սմբատյանը վստահեցնում է, որ նման արտիստների հրավիրելը ոչ միայն երաժշտական կյանքի հարստացում է, այլև երկրի մշակութային ճանաչելիության բարձրացում։
«21-րդ համերգաշրջանում մենք ունենք աշխարհահռչակ մենակատարներ, որոնց հետևում է ամբողջ աշխարհը։ Նման դասական, ակադեմիական աստղերի բերելով մեր երկիր՝ Հայաստանը դնում ենք մշակութային քարտեզին, որտեղ ես, որպես դասական երաժշտության ներկայացուցիչ, ուզում եմ Հայաստանը տեսնել։ Եվ դա մեր մեծագույն ձեռքբերումն է», - նշեց նա։
Հայկական երաժշտական ժառանգությունը՝ միջազգային բեմերում
Նվագախումբը շարունակելու է կենտրոնում պահել հայ կոմպոզիտորների ժառանգությունը։ Սմբատյանի խոսքով՝ միջազգային ծրագրերում կհնչեն այն հեղինակների ստեղծագործությունները, որոնք ձևավորել են մեր մշակութային ինքնությունը։
«Ունենք նպատակ ներկայացնելու մեր ժառանգությունը, այն մեծ հեղինակներին, որոնք փոխել են մեր աշխարհընկալումը՝ Տերտերյան, Խաչատրյան, Աճեմյան, և ժամանակակից հերոսներին, որոնցով մեզ ճանաչում են՝ Մանսուրյան, Ուլիխանյան և այլք», - ասել է նա։
Համերգներ Երևանում և մարզերում. անկախության 35-ամյակի տոնակատարություններ
Նվագախումբը կարևորում է ոչ միայն մայրաքաղաքի, այլև մարզերի մշակութային կյանքի ակտիվացումը։ 2026 թվականին նախատեսվում է մեծ ծրագիր՝ մարզերում մշակութային հասանելիությունն ընդլայնելու համար։
Առաջիկա կարևոր համերգներից մեկը տեղի կունենա սեպտեմբերի 18-ին Վանաձորի Հայքի հրապարակում՝ Հայաստանի անկախության 35-ամյակին նվիրված միջոցառումների շրջանակում։ Ծրագրում կհնչի սիմֆոնիկ ռոք և ֆոլկ երաժշտություն։
Իսկ սեպտեմբերի 21-ին՝ Անկախության տոնի օրը, նվագախումբը ելույթ կունենա Երևանի Հանրապետության հրապարակում՝ տարվա գլխավոր տոնական միջոցառման ժամանակ։
Կրթական ծրագրերը՝ նոր սերնդի դաստիարակության առաքելություն
Համերգային գործունեությանը զուգահեռ՝ նվագախումբը շարունակում է զարգացնել կրթական ծրագրերը։ Նպատակը ոչ միայն նոր լսարանի ձևավորումն է, այլև երիտասարդների համար դասական երաժշտության և մասնագիտական միջավայրի հասանելիության ապահովումը։
Մեծ անակնկալը՝ դեռ փակագծերում
Հայաստանի պետական սիմֆոնիկ նվագախումբն այս տարի ևս նախատեսում է իրականացնել Լանգ Լանգի համերգի մասշտաբին համադրելի մեծածավալ ծրագիր։ Սակայն նախաձեռնության մանրամասները դեռ չեն հրապարակվում։ Նվագախմբի ներկայացուցիչները նշեցին, որ փակագծերը կբացվեն ավելի ուշ։
Այսպիսով, 21-րդ համերգաշրջանը խոստանում է դառնալ հայ մշակույթի հաղթանակի ևս մեկ էջ՝ միավորելով անցյալի մեծությունը, ներկայի ձեռքբերումները և ապագայի հույսը։