Թեհրան. «Միացեալ Նահանգներու հետ բանակցելու որեւէ ծրագիր գոյութիւն չունի»
Իրանն ու Միացեալ Նահանգները շարունակեցին փոխադարձ ռազմական հարուածները՝ թիրախաւորելով ռազմական ենթակառոյցներ, մինչ Թեհրանը զգուշացուց, որ Հորմուզի նեղուցին նկատմամբ որեւէ միջամտութիւն անընդունելի է եւ կտրուկ հակադարձութեան պիտի արժանանայ։ Միեւնոյն ժամանակ Իրանը յայտարարեց, որ ներկայիս Միացեալ Նահանգներու հետ բանակցելու ծրագիր չունի, իսկ Փաքիստանը երկու կողմերուն կոչ ուղղեց դադրեցնելու բռնութիւնը եւ վերադառնալու երկխօսութեան։
Ամերիկեան հարուածները Իրանի դէմ
Ամերիկեան բանակի կեդրոնական շրջանի հրամանատարութիւնը հաղորդագրութիւն մը հրապարակելով յայտնեց. «Կեդրոնի հրամանատարութիւնը Իրանի դէմ հարուածներու երեկոյեան ալիքը աւարտած է 15 յուլիսին' Միացեալ Նահանգներու արեւելեան ափի ժամանակացոյցով ժամը 21:00-ին: Միացեալ Նահանգներու զինեալ ուժերը հարուածած են իրանեան հրամանատարական կեդրոններ, հակաօդային պաշտպանութեան համակարգերու, հրթիռներու եւ անօդաչու թռչող սարքերու տեղակայման վայրեր, ինչպէս նաեւ առափնեայ դիտակէտեր»:
Ամերիկեան բանակի կեդրոնական շրջանի հրամանատարութիւնը նշած է, որ ամերիկացի զինուորները օգտագործած են բարձր ճշգրտութեան զինամթերք, հարուածներ հասցուած են, այլ վայրերու շարքին, նաեւ Պանտար Ապպաս քաղաքին:
Իրանի Յեղափոխական պահակագունդի հակահարուածը
Իրանի Յեղափոխական պահակագունդը իր կարգին հարուածներ հասցուցած է Քուէյթի մէջ Միացեալ Նահանգներու «Ալի Սալեմ» ռազմակայանին մէջ ամերիկացի զինուորներու տեղակայման վայրին:
«Քուէյթի «Ալի Սալեմ» օդուժի ռազմակայանին մէջ «Սի-ՌԱՄ» վաղ նախազգուշացման ռատարի համակարգը, ինչպէս նաեւ ամերիկեան զօրքերու տեղակայման շրջանը դարձած են համակցուած հարուածի թիրախներ «Նասր-2» գործողութեան ութերորդ ալիքի ընթացքին», ըստ «Փրես Թի.Վի.»-ի, իր յայտարարութեան մէջ ըսած է Իրանի Յեղափոխական պահակագունդը:
Պահակագունդը նաեւ հարուածներ հասցուցած է Յորդանանի մէջ ամերիկեան «Ազրաք» օդուժի ռազմակայանին: Խոցուած են ամերիկեան զինեալ ուժերու կապի համակարգերն ու վառելանիւթի պահեստները:
Հորմուզի նեղուցը՝ Իրանի կարմիր գիծ
Իրանեան զինեալ ուժերու «Խաթեմ Անպիա» կեդրոնի բանբեր Իպրահիմ Զուլֆիքարի նշեց. «Որեւէ պահու կամ ձեւով Միացեալ Նահանգներուն' իբրեւ շրջանէն դուրս եղող երկիր, պիտի չարտօնուի Հորմուզի նեղուցին մէջ միջամտել»' աւելցնելով, որ ատիկա «իրանի անբեկանելի կարմիր գիծ է»:
«Միացեալ Նահանգներու նախագահ Տանըլտ Թրամփի իր երկրի բանակին կողմէ Իրանի ենթակառոյցները թիրախաւորելու դատարկ վերջին սպառնալիքի գործադրութեան պարագային, Իրանի ազնուութեան պատճառով մինչեւ հիմա անվնաս մնացած ամէն բան, այսինքն' շրջանին մէջ բոլոր ենթակառոյցները կը ճզմուին Իրանի իսլամական հանրապետութեան կարող զինեալ ուժերու պողպատեայ հարուածներուն տակ, այնպիսի ձեւով մը, որ անոնց հետքը պիտի չմնայ, կարծէք սկիզբէն գոյութիւն չունեցած ըլլային», ըսաւ ան:
Թեհրանը մերժեց բանակցութիւնները
Իրանի արտաքին գործոց նախարարութեան բանբեր Իսմայիլ Պաղայի կտրուկ կերպով մերժեց Միացեալ Նահանգներու նախագահ Տանըլտ Թրամփի վերջին պնդումները, թէ Իրան Միացեալ Նահանգներուն հետ կապ հաստատած է եւ կ՛ուզէ համաձայնութիւն կնքել:
«Իրան ներկայիս բանակցելու որեւէ ծրագիր չունի, պաշտպանութեան վրայ կը կեդրոնանայ եւ Միացեալ Նահանգներու հետ կապ չհաստատեց», նշեց Պաղայի:
Ան ըսաւ, որ իր երկիրը Միացեալ Նահանգներու հետ կնքուած փոխըմբռնման յուշագիրին յանձնառու պիտի մնայ, «քանի տակաւին միւս կողմը իր խոստումները կը յարգէ»:
«Դիտաւորեալ կերպով «հարաւային Իրան»-ի մասին խօսողները կը ջանան ամրագրել պատկեր մը հողի մը, որ միայն իր աշխարհագրական ուղղուածութեամբ ծանօթ չէ», աւելցուց ան:
Իրանի արտաքին գործոց նախարարութեան բանբերը յայտնեց, որ փոխըմբռնման յուշագիրը խորքին մէջ փոխադարձ յանձնառութիւններ եւ պարտաւորութիւններ կ՛ենթադրէ, եւ իրանեան զինեալ ուժերը ապացուցեցին, որ իրանեան հողերուն վրայ որեւէ յարձակում հակադարձութեան պիտի արժանանայ:
«Փոխըմբռնման յուշագիրը մեզի համար արժէք ունի, քանի տակաւին մեր շահերն ու ազգային անվտանգութիւնը կ՛երաշխաւորէ», նշեց Պաղայի:
Գերագոյն հոգեւոր պետի խորհրդականը Հորմուզի նեղուցը Իրանի սեփականութիւն կը համարէ
Իրանի գերագոյն հոգեւոր պետի խորհրդական Ալի Աքպար Վելայեթի յայտնեց, որ Հորմուզի նեղուցը «Իրանի սեփականութիւնն է, եւ աշխարհի վրայ չկայ ուժ մը, որ կրնայ անոր վրայ իր գերիշխանութիւնը խլել»:
«Հորմուզը գերագոյն հոգեւոր պետին որոշումով Իրանի գերիշխանութեան ենթակայ դարձաւ», շեշտեց ան' ատիկա նկատելով «քառասնօրեայ պատերազմէն ետք իրագործուած ձեռքբերում մը»:
Փաքիստանի միջնորդութիւնը
Փաքիստանի արտաքին գործոց նախարարութիւնը Միացեալ Նահանգներուն եւ Իրանին կոչ ուղղեց' բռնարարքին վերջ տալու եւ շարունակելու անցեալ ամիս Իսլամապատի միջնորդութեամբ ստորագրուած փոխըմբռնման յուշագիրին մէջ նշուած բանակցութիւնները:
Փաքիստանի արտաքին գործոց նախարարութեան բանբեր Թահեր Անտրապի յայտնեց. «Հակառակ այն իրողութեան, որ փոխըմբռնման յուշագիրի գործադրութիւնը դժուարութիւններ կը դիմագրաւէ, Փաքիստան պիտի շարունակէ բոլոր կողմերը քաջալերել' վերջ տալու բռնութեան եւ յուշագիրի կէտերուն համապատասխան թեքնիք քննարկումները շարունակելու»:
Աղբիւրներ «Ռոյթըրզ» լրատու գործակալութեան յայտնած են, որ Իրան Եմէնի Անսարուլլա շարժումին կոչ ուղղած է Կարմիր ծովուն մէջ Պապ Մանտեպ նեղուցը փակելու, եթէ Միացեալ Նահանգներ Իրանի մէջ ուժանիւթի ենթակառոյցներուն վրայ յարձակում գործեն: